ئەنجومەنی وەزیرانى هەرێم بۆ یەکلاییکردنەوەی پرسی مووچە کۆدەبێتەوە

#بوار

لە کاتێکدا مووچەخۆران لە چاوەڕوانیی هەواڵێکی یەکلاکەرەوەدان، ئەمڕۆ چوارشەممە، ئەنجومەنی وەزیرانی هەرێمی کوردستان کۆدەبێتەوە و پرسی مووچە و شایستە داراییەکان دەبێتە تەوەری گەرم و سەرەکیی مێزی گفتوگۆکان.

کۆبوونەوەکە بە سەرپەرشتیی مەسرور بارزانی، سەرۆکوەزیران و ئامادەبوونی قوباد تاڵەبانی، جێگری سەرۆکوەزیران بەڕێوەدەچێت، تێیدا تیشک دەخرێتە سەر سێ دۆسیەی گرنگ کە ڕاستەوخۆ پەیوەستن بە ژیان و گوزەرانی هاووڵاتییان و ڕێکخستنەوەی ناوخۆیی هەرێمەوە.

کارنامەی کۆبوونەوەکە ئەم بڕگە سەرەکییانە لەخۆدەگرێت:

•  چارەنووسی مووچە و هەڵوێستی دارایی:

 بڕگەی یەکەم و هەستیارترین تەوەر، تەرخانکراوە بۆ بەدواداچوونی وردی دواهەڵوێستی بارودۆخی دارایی هەرێم و ئاستەنگەکانی بەردەم خەرجکردنی مووچە. 

•  لەم چوارچێوەیەدا، دەرئەنجامی کۆبوونەوەی تیمی هاوبەشی هەردوو دیوانی چاودێریی دارایی (فیدراڵی و هەرێم) لەبارەی ئاستی پابەندییە داراییەکانی نێوان هەولێر و بەغدا لە بەرامبەر یەکتر تاوتوێ دەکرێت.

•  یەکخستنەوەی هێزەکانی پێشمەرگە: 

لە بڕگەی دووەمدا، هەڵسەنگاندن بۆ ئەو هەنگاوانە دەکرێت کە لەم دواییانەدا نراون بۆ خستنەبواری جێبەجێکردنی چاکسازییەکانی وەزارەتی پێشمەرگە و کۆکردنەوە و ڕێکخستنەوەی سەرجەم هێزەکان لەژێر چەتری یەک وەزارەتدا.

•  درێژکردنەوەی لێخۆشبوونی سزای هاتوچۆ: 

بڕگەی سێیەم تاوتوێکردنی پێشنیارێکی وەزارەتی ناوخۆیە، کە دەبێتە هەواڵێکی باش بۆ شۆفێران. بڕیار دەدرێت لەسەر درێژکردنەوەی بڕیاری پێشووی ئەنجومەنی وەزیران (ژمارە 282)، تایبەت بە لێخۆشبوونی سزاکانی سەرپێچیی هاتوچۆ بە ڕێژەی (20%). ئەگەر بڕیارەکە پەسەند بکرێت، ماوەی لێخۆشبوونەکە بۆ شەش مانگی دیکە و تاکوو 30ی حوزەیرانی 2026 درێژ دەکرێتەوە.