بوار، تایبەت
لە گۆڕانکارییەکی سیاسیی گرنگدا، پارتی دیموکراتی کوردستان پێگەی خۆی لە کابینەی نوێی حکوومەتی فیدراڵدا بەهێزتر دەکات و جگە لە بەڕێوەبردنی دوو وەزارەتی گرنگ، پۆستی جێگری سەرۆکوەزیرانی عێراقیش وەردەگرێت.
پشکی پارتی؛ تێکەڵەیەک لە دیپلۆماسی و ئاوەدانکردنەوە
شاخەوان عەبدوڵڵا، سەرۆکی فراکسیۆنی پارتی لە پەرلەمانی عێراق، وردەکاریی بەشداریی حزبەکەی ئاشکرا کرد و ڕایگەیاند، پارتی جگە لە وەرگرتنی وەزارەتەکانی (دەرەوە، ئاوەدانکردنەوە)، پۆستی جێگری سەرۆکوەزیران بۆ پارتی دەبێت و ئەم پۆستە بە تەنیا (بەبێ وەزارەت) دەبێت بۆ ئەوەی زیاتر بایەخ بە هەماهەنگی و بڕیارە ستراتیژییەکان بدرێت.
کابینەیەکی ناتەواو؛ گرفتەکان لە نێوان هێزە شیعەکاندا
سەرەڕای ئەوەی بڕیارە سبەی پەرلەمان بۆ متمانەدان بە حکوومەت کۆببێتەوە، بەڵام شاخەوان عەبدوڵڵا ئاماژەی بەوە کرد کە پێناچێت هەموو وەزیرەکان متمانە وەربگرن. ململانێی توند لە نێوان کوتلە سیاسییەکان، بەتایبەت لەسەر ئەو وەزارەتانەی دراون بە 'قەیس خەزعەلی' و چەند لایەنێکی دیکە، بووەتە هۆی ئەوەی بەشێک لە پۆستەکان بۆ قۆناغی داهاتوو بمێننەوە. تەنانەت پۆستی جێگرانی سەرۆکوەزیرانیش بەهۆی هەبوونی کێشە لەسەریان، ئەگەری هەیە دەنگدانیان لەسەر پەکبخرێت.
ستراتیژی پارتی؛ ماف نەک تەنیا پۆست
شاخەوان عەبدوڵڵا جەختی لەوە کردەوە کە ئامانجی سەرەکیی پارتی لەم کابینەیەدا تەنیا پۆست و وەزارەت نەبووە، بەڵکو جێگیرکردنی مافە دەستوورییەکانی خەڵکی کوردستانە، بەتایبەت ماددەی ١٤٠ و چەمکەکانی شەراکەت و سازان. ئەم بڕیارە کۆتاییەش دوای سەردانە سەرکەوتووەکەی نێچیرڤان بارزانی بۆ بەغدا و گەیشتن بە ڕێککەوتنی کۆنکرێتی لەسەر پرسە جەوهەرییەکان هاتە ئاراوە
عربي
وەزارەتی ناوخۆ: لە ڕەوتی بەدر وەرگیرایەوە و درا بە 'دەوڵەتی یاسا'.
