نابێت وەهاب هەڵەبجەی هەموو دژەتیرۆری لەبەر دەست بێت

بوار، تایبەت

بافڵ تاڵەبانی، سەرۆکی یەکێتی نیشتمانی کوردستان دەیەوێت ڕۆڵی وەهاب هەڵەبجەیی لە دەزگای دژە تیرۆر لاواز بکات.

سەرۆکی یەکێتی پێی وایە، بەهۆی ڕۆیشتنی ئەژی ئەمینەوە پێگەی وەهاب هەڵەبجەیی بەهێزتر بووە، بۆیە نایەوێت هیچ بەرپرسێکی ئەمنی پێگەکەی بەهێز بێت و لەداهاتوودا ببێتە مەترسی بەسەرییەوە، بەڵکو بەردەوام خەریکی دابەشکردن و پەرتکردنی دەسەڵاتی ئەو بەرپرسانەیە کە لەگەڵیدا کاردەکەن.

بەپێی زانیارییەکانی بوار، لە ئێستادا بافڵ تاڵەبانی، لە هەوڵی ئەوەدایە کە وەهاب هەڵەبجەیی، بچووکبکاتەوەو سەرەتای هەوڵەکانیشی بە دابەشکردنى هێزەکانى دژەتیرۆر دەستپێکردووە، کە تیمێکى تەواوی جیاکردۆتەوە بە سەرکردایەتى لەشکر پشدەری وەکو پاسەوانی خودی بافڵ تاڵەبانى دەرئەکەون و ڕاستەوخۆ فەرمان لەخودی بافڵ تاڵەبانی وەردەگرن.

لەدوای ئەوە لە ئێستادا هەوڵی جیاکردنەوەى تیمێکى تر ئەدات لە ڕێگاى هەکاری باڵەکییەوە، ئەمەش بۆ ئەو ئامانجەیە هێزەکانی دژە تیرۆر دابەش ببن بەسەر چەند جومگەیەکی جیاواز نەک هەموویان فەرمان لەیەک کەس وەربگرن.