هەفتەی رابروو لە سلێمانی چی ڕوویدا؟
بۆچی هێز، لە نزیك هۆتێل لالەزار كۆكرایەوە؟
كێ بە ئامانج گیرابوو، بۆچی ئەو كەسانە دەستگیرنەكران؟
دوو فڕۆكەكە چ دۆخێكیان لە ناو هێزە ئەمنییەكانی سلێمانی و یەكێتی دروست كرد؟
بافڵ تاڵەبانی گومانی لە كێ هەیەو بەنیازی چ بووە بیكات؟
كێ رێگری لە پێكدادانی سەربازی كرد؟
شەوی 15 لەسەر 16ی ئادار لە شاری سلێمانی، بۆ ماوەی دوو سەعات دوو فڕۆكەی سیخوڕی بەئاسمانی شاری سلێمانیدا سووڕاونەتەوە، ئەمە گومانی لای بەرپرسانی ئەمنی شارەكە دروستكردووەو راستەوخۆ بافڵ تاڵەبانی سەرۆكی یەكێتی نیشتمانی لێ ئاگاداركراوە.
گومانەكان ئەوكاتە زیاتر بوون، كە دوو فڕۆكەكە دوای سلێمانی چوونەتە ئاسمانی ناوچەكانی بتوێن و پشدەرو ماوەیەكیش لەوێ ماونەتەوە.
ئەمە وایكردووە، راستەوخۆ بافڵ تاڵەبانی بۆ ئەو پرسە بێتە سەر خەت و پەیوەندی بە هێزەكانی هاوپەیمانان و تەنانەت ئێرانییەكانیش بکات و پرسیاری ئەوەی لێكردوون، ئەو فڕۆكانە سەر بەهێزەكانی ئەوانە؟
كاتێك بافڵ تاڵەبانی وەڵامی نەخێری لە هاوپەیمانان و تەنانەت ئێرانییەكانیش وەرگرتووە، راستەوخۆ گومانی بۆ دەزگای هەواڵگیری توركیا بردووەو گومانی ئەوەشی كردووە، چەند كەس و لایەنێكی هەرێمی كوردستان لە پشت ئەو كارەوە بن و هاوكاری دەزگا هەواڵگیرییەكانی توركیا بكەن.
بەپێی زانیارییەكانی بوار، كە لە زیاتر لە سەرچاوەیەكەوە دەستیكەوتووە، گومانی بافڵ تاڵەبانی بۆ بەرپرسێكی خەڵكی ناوچەكە چووە، كە لە سەرۆكایەتی هەرێم پۆستێكی باڵای هەیەو بەم دوایانەش زیاتر گومانی بۆ دروست بووە، كە ئەو لە پشت جموجوڵەكانی هەواڵگری توركیایە لەناوچەكانی سنووری یەكێتی.
هەر بەپێی زانیارییەكان، بافڵ تاڵەبانی گومانی لەوەش هەبووە، ئەو بەرپرسە باڵایەی هەرێم لە رێگەی لاهور شێخ جەنگی هاوسەرۆكی پێشووی یەكێتی نیشتمانی و چەند كەسێكی نزیكی كارەكانی رایی بكات لە ناوچەكە، بۆیە راستەوخۆ رۆژی دواتر فەرمانی بە هێزە ئەمنییەكانی یەكێتی كردووە چەند جموجوڵێكی سەربازی ئەنجامبدەن.
بوار زانیویەتی، كۆكردنەوەی هێز لە رۆژی پێنج شەممەی رابردوو، 16ی ئادار، لە کۆڵانە جیاوازەكانی گەڕەكی سەرچنارو ئامادەكارییەكانی هێزەكان بۆ جێبەجێكردنی چەند ئەرکێك بووە، ئەوەش لەسەر فەرمانی بافڵ تاڵەبانی.
زانیارییەكان باس لەوەش دەكەن، كە یەكێك لە ئەركەكانی هێزەكە ئەوە بووە، كە راستەوخۆ بچنە هۆتێل لالەزار لە سەرچنارو پۆڵاد شێخ جەنگی برای لاهور شێخ جەنگی و چەند كەسێكی تر دەستگیر بكەن.
هەروەها زانیارییەكان باس لەوەش دەكەن، كاتێك لاهور شێخ جەنگی بەم هەوڵە دەزانێت راستەوخۆ پەیوەندی بە هاوپەیمانان و ئێرانییەكان و تەنانەت سەرۆكایەتی هەرێم و حكومەتیش دەكات، كە دۆخێكی وا هەیەو ئەگەر هێرش بكرێتە سەریان كاردانەوەیان دەبێت و بەرپرسیاری هیچ رووداوێكی نەخوازراویش هەڵناگرن، ئەگەر بەو هۆیەوە رووبدات.
ئەمە وایكردووە، راستەوخۆ هاوپەیمانان و ئێرانییەكانیش بۆ ئەو بابەتە بێنە سەر خەت و داوایان لە بافڵ تاڵەبانی كردووە، تەواوی هێزەكان بكشێنێتەوەو ئەو ئەركانەی بەو هێزە دراون، جێبەجێنەكەن.
عربي
