بفکرە، کاربکە و پاشی بڕیارێ بدە!
جیهاد عەلی حامد
ل ژێر ڤێ مانشێتێ من پێ باشە چەند دلۆپەکێن حبرا خامەیا خوە بڕێژمە سەر ڤی دەفتەرو لاپەڕێ، ل پێشیێ ئەز دێ دوو ژ ئەوان ئاخافتنێن ئەزەلی ئینمە زمان ئەو دوو ئاخافتنێن زەقێن د ناڤا نەتەوا کورد دا و چەندین جار ئەم د بهیسین و پەردێن گۆهێن مە کەڕ د کەن و د سمن!
١- سیاسەت بەحرە.
٢- سیاسەت درەوە!
ئەم وەکۆ خوەندەڤانێن سیاسەتێ و ئەز وەکۆ ڕۆژنامەڤان و هندەک هایداری سیاسەتا سیاسەتڤانێن کورد ل باشۆرێ کوردستانێ. بڕاستی حەیری د مینم و ل زور جها د چەقم و ئاسێ د مینم و ئێدی ناچار دبم تەسلیم ببم و ببێژم نە ئەز ڤەڕڕەکێ ژ سیاسەتێ دزانم، نەژی د کارم فێر ببم!
ل وەڵاتێن ئۆروپی و ڕۆژئاڤایی ب گشتی ئینسانەک دەهـ ساڵ کارێ خوە بکەتە سیاسەت،دێ ئینسانەکێ زاناو دانا و فاما دەرکەڤیت و دێ بیتە سیاسەتڤانەکێ خودان بۆچوون و ئەزموون و دێ کاریت ل دەورو بەرێن گۆرەپانا سیاسی زور پێشبێنی و پێشهاتان بکەت و زور شلۆڤەیێن سیاسی بکەت و دێ ٨٠٪ ژ پێشبینیێن وی ڕاست دەرکەڤن.
لێ ئەز وەکۆ گەنجەک ل باشۆرێ کوردستانێ و ها وەختە تەمەنێ من دێ خاترێ ژ گەنجاتیێ خوازیت، من نەشیایە دلۆپەکێ ژ وێ دەریایا سیاسەتێ بزانم و فێرببم و من نەشیایە یەک پێشبینی ل بارا سیاسەتێ و هەلبژادن و دەنگدانا سیاسی و جەماوەری بکەم، چۆنکە ئەم یێ د کەتینە د ناڤا دەریایەکا سیاسی یا شێلی داو تا نها مە ئاڤەک زەڵال نە دیتە.
سیاسەتڤانێن کورد ل باشۆرێ کوردستانێ ناڤێ سیاسەتێ ل خوە کریە، لێ حەیفە ئەڤ ناڤێ گران لسەر خوە دانای!
دڤیا ناڤێ وێ بگهۆڕن و بکەنە(بازرگانی کرن ب سیاسەتێ).
سیاسیێن کورد هند قەدەر درەوینن و سیاسەت فرۆشن ئێدی سیاسەتێ ل باشۆرێ کوردستانێ ناسناڤێ (درەو) ل خۆە مۆرو قامچە کریەو سیاسەت ب درەوێ بەرنیاس بویە.
ئەڤێ درەوێ ب سەدان گەنجێن دلسۆزو خودان باوەر ژی ب سەردا برینەو کرینە مەزنترین درەوین و زورینەیا وان بۆینە بکڕو فرۆشیارێن ڤێ بازرگانیێ بۆ نمۆنە: چەندین ساڵە ل باشۆرێ کوردستانێ لەشکەرەکێ ڕۆژنامەڤان و چاڵاکڤانێن مەدەنی و سیاسی هاتینە هەبوونێ و تا حەددەکی بەرنیاس بووینە و زورینەیا وان بۆینە قۆربانێن دلسۆزی و ڕاستگۆیا خوەو ڕۆژانێن ژیانا خوە گۆری ئارمانجا خوە یا مەزن کرینە و هەبوینە ل پێخەمەت پەیاما خوە یا ڕاست و ڕەوا هاتینە شەهید کرن و هەبووینە چەندین ساڵان هاتینە زیندانکرن و ئەشکەنجەدان، لێ ب مخابنی و حەیف ڤە دێ بێژم ب ساناهی ئەڤ گەنجە ل بازاڕەکێ بێنامیس و قەشمەر هاتنە هەڕاچ کرن و بازرگانێن سیاسەتێ ئەڤ گەنجە کرنە پەرتالەک و کڕین و فرۆتن ب ئەوان هاتە کرن و حاشا مینا بەرخ و بزنا ل مەیدانکا بێ رەحما سیاسەتا درەو هاتنە کڕین و فرۆتن و هەر ئێک ب بهایەکی هاتە فرۆتن!
ئێدی کەسەکێ وەکۆ من ژی ناحەق نینە سەرگەردان و بەرزەو ونداببیت و ئێدی ئەز نا حەق نینم بێژم سیاسەت درەوە!
من ژیێ خوە ب داوی ئیناو من ژ سیاسەتێ فام نەکرو ئەڤ زانستێ هندە قەدەر مەزن ل جەم من بویە تافهـ و کرێترین زانست و بێنامیسێن سیاسەتێ سیاسەت د دەلنگ و دەهمەنا قەحبەکێ دا لەوتاند و مەزاد کر.
ئیدی من نەڤێت نێزیکی وێ پیسیێ و وێ بێهنا مرارو گەنی ببم و ناچارم حەزەرا خوە ژ درەوین و ڕاستگۆیا بکەم! و دەستا داهێلم و تەسلیمی ڤێ ڕاستیا حاشا هەلنەگر ببم و ببمە نەزان و کۆلفامەک و ئالایێ سپێ ل بانێ خوە ب دالقینم و بێژمە درەوین و ڕاستکۆیێن سیاسەتێ خوە نێزیک من نەکەن، هین هەمی درەوینن و سیاسەت درەوەو و ئەز یێ د دەریا ڤێ درەوێ دا خەندقیم.
